REFUDAMES CHE FARA' STORIA
Claus Soraperra e Manuel Riz é endò stac pizochenc con la neva opera d’èrt te Frida Street Gallery a Cianacei
Claus Soraperra e Manuel Riz é endò stac pizochenc con la neva opera d’èrt te Frida Street Gallery a Cianacei
Dò che l’an passà i aea
confezionà la neif del giacé de la Marmolèda, chest an duc era curiousc de
veder che che aea enjignà enstouta Claus Soraperra e Manuel Riz, i doi amisc e
artisć da Cianacei che colaborea da egn per portèr mìngol de èrt pizochenta te
noscia val.
Da canche i à ciapà te man la
vedrina de Frida Bernard Pitscheider del Garnì Hirsch a Cianacei, acà doi egn,
Claus e Manuel i tacà à meter fora operes o projec con na funzion ence sozièla,
chela de fèr pissèr la jent a fac de la vita de duc i dis.
Via per chest an i à metù
fora cater operes: l pan bianch e l pan brujà su la costion di enfughé, na
lingia de scartabìe “chiuso” che se troa sui ujes de boteighes, hotìe e restoranc
fora de sajon; na bandiera ladina sul stil di Stac Unii e amò ence
“l’apreskiboot”, ciuzé da schi de chi che dò na dì sui schi vel se fermèr ti
apreski. (http://fridastreet.blogspot.it/)
Ma n’outa a l’an... ades i ne
à usà e se speton che i lo fae ence l’an che vegn, i fèsc ence vèlch de spezièl
e chest an i à metù via i refudames del bosch.
Dò aer śirà d’istà sui troes da mont, Manuel e
Claus à tout sù i refudames e i li à metui via e confezioné con tant de numer,
post olache i l’à tout sù e scrites per ladin. Ogne refudam te so scartoz de
plastica net e nef, desche se fossa n souvenir... n souvenir da la Dolomites.
Orcena touta sù dut intorn
Cianacei: cocoi de banda de la beandes, schipas, bulons, bocoles de boces, toc
de bachec da schi, caneles e amò integratores di ziclisć e na lingia de robes
da restèr de sas. “Sion jic a pe de spes d’istà – à spiegà i doi artisć – scontraane families con fiores, fonghes, sasc o osc. I
se portèa a cèsa dut... desche souvenir. Nos però volaane fèr zeche de nef, che
pièje con mìngol de design”.
E dò aer pissà e pissà ge é
vegnù l’idea del “Souvenir Dolomites”: orcena, petorcena, refudames te sachet
ma che più che dut l’é n’opera d’èrt con n segnificat. Un pel grignèr, se
maraveèr, se utèr da l’autra e pissèr chel che l vel, ma enstadì ic doi à
amàncol volù portèr la jent a na reflescion. “Chel che nos lascion - i à dit - l vegnarà tout sù tel davegnir e
l mosciarà chi che siane. Canche i archeologhes i jirà a ciavèr i troarà duta
chesta orcena e sarà chesta robes chiò che ge dirà chi che sion stac... che ne
metarà te la storia e che darà l’inom a noscia popolazion”. Donca con l
Souvenir Dolomites se à volù dir ence che la storia la fajon ogne dì e la fajon
nos. Sion duc responsaboi.
Valentina Redolfi
Nessun commento:
Posta un commento