GIRINS DE LA TÈLIA
Manuel Riz e Claus Soraperra ì à endò endrezà na pìcola festa tedant a la Frida Street Gallery a Cianacei. Chest an l'opera d'èrt é stata fata dal publich
"Aon dezidù de se binèr d'aisciuda percheche cherdane che fosse manco freit che d'uton" - i à dit Manuel Riz e Claus Soraperra, ma en vender ai 29 de oril a Cianacei someèa endò d'uton e finamai l fiochèa.
Ence chest an i doi artisć da la Val de Sora i à endrezà n moment culturèl tedant a la vedrina espositiva te Strèda del Faure de Cianacei "Frida Street Gallery", touta te man da ic doi dal 2013.
L prum an i aea metù la neif de la Marmolèda te cocol e l'an passà i Souvenirs da la Dolomites (refudames troé tel bosch) ti sachec. Chest an se se spetèa endò velch de spezièl e coscita l'é stat. I é rué sul tandem e i à fat dotrei "girini" con la roda tel zenter de Cianacei e dò i se à fermà tedant a la vedrina e i à tirà jù l telon che coria l chèder...ma enveze che veder zeche l'era demò n gran sfoi bianch e nia de auter. Se à entenù sobito che l'era dut bianch percheche Manuel e Claus i à volù che i artisć fosse enstouta l publich: chest an ic doi i é passé de livel e doventé curadores de la galarìa d'èrt... I à tirà cà i bossoi coloré e i à chiamà un a l'outa i amisc a sbichèr "girins" resa sul sfoi bianch, sperimentan la tecnica del stencil tipich de la street art. L tem l'era l Giro de la Tèlia o miec "Girino de la Tèlia" e l'opera d'èrt se la pel mirèr amò sul mur del Garnì Hirsch da Frida.
L "vernissage" de Frida Street Gallery, apede a la valuta artistica, ence chest l'é stat n moment per stèr ensema e se fèr doi ciacoles anter amisc de paìsc. Per cognoscer miec la galarìa d'èrt se pel vijitèr ence l blog: http://fridastreet.blogspot.it.
Valentina Redolfi
Nessun commento:
Posta un commento